Sulat mula sa Direktor
Mahal na Botante ng San Francisco: Enero 2, 2020
May ilang opsiyon ang mga botante sa pagtanggap ng balota na naglilista ng partikular na mga kandidato para sa Pagkapangulo sa darating na Consolidated Presidential Primary Election (Pinagsamang Primaryang Eleksyon para sa Pagkapangulo) sa Marso 3, 2020. Upang malaman pa ang tungkol sa pagboto sa primaryang eleksyon, bisitahin ang sfelections.org/2020primary.
Tampok din sa website ng Departamento, na sfelections.org, ang “March 2020 Presidential Primary Ballot Tool” (Tool para sa Balota sa Marso 2020 Primarya para sa Pagkapangulo), na nasa homepage. Nagkakaloob ang tool na ito ng mabilis na paraan upang matingnan ang kinakatigang partido na kaugnay ng mga rekord sa pagpaparehistro ng botante. Nagkakaloob din ang tool na ito sa mga botante ng mga opsiyon upang makakuha ng balota na naglilista ng mga kandidato sa pagkapangulo na kaugnay ng mga espesipikong politikal na partido.
Ang Kinakatigang Politikal na Partido ang Nagtatakda Kung Sino-sinong Kandidato ang Lalabas sa mga Balota
Kailangang ideklara ng mga botante ang kanilang kinakatigan para sa politikal na partido upang makatanggap ng balota na may mga kandidato para sa pagkapangulo. Tatanggap ng balotang nagsasama ng mga kandidato sa pagkapangulo ng gayong partido ang mga botanteng nagtala ng kinakatigang politikal na partido sa kanilang rekord sa pagpaparehistro ng botante.
Tatanggap ang mga botanteng walang idineklara na kinakatigang politikal na partido ng balotang walang kandidato sa pagkapangulo. Gayon pa man, maaari pa ring makatanggap ang botanteng walang idineklara na kinakatigang politikal na partido ng balota na naglilista ng mga kandidato ng isang politikal na partido sa pamamagitan ng paghiling ng “crossover” na balota o sa pamamagitan ng muling pagpaparehistro para sa pagboto.
Maaaring muling magparehistro ang mga botante upang mapalitan ang kanilang kinakatigang partido sa registertovote.ca.gov hanggang sa Pebrero 18. Pagkatapos nito, maaari muling magparehistro ang mga botante sa mga sentro ng botohan o lugar ng botohan.
Crossover na Pagboto at Muling Pagpaparehistro para sa Pagboto, para sa mga Botanteng Walang Kinakatigang Politikal na Partido
Tatlong politikal na partido, ang American Independent, (Amerikanong Independiyente), Democratic (Demokratiko), at Libertarian (Libertaryan), ang nagpapahintulot sa mga botanteng hindi nagdeklara ng politikal na partido noong nagrehistro para sa pagboto, na makatanggap ng balotang naglilista sa kandidato sa pagkapangulo ng mga partidong iyon. Maaaring humiling ang mga botante ng crossover na balotang ito sa kanilang mga lugar ng botohan, sa isa sa tatlong sentro ng botohan, o sa pamamagitan ng koreo. Gayon pa man, Pebrero 25 ang deadline ng paghiling ng balotang vote-by-mail (pagboto sa pamamagitan ng koreo).
Upang maiboto ang mga kandidato para sa pagkapangulo na kaugnay ng mga partidong Green (Luntian), Peace and Freedom (Kapayapaan at Kalayaan), at Republican (Republikano), kailangang muling magparehistro para sa pagboto ang mga botante at piliin ang isa sa mga partidong ito sa form para sa pagpaparehistro.
Pagkuha ng Kapalit na Balotang Vote-by-Mail
Tatanggap ang mga botanteng walang idineklara na kinakatigang politikal na partido ng balotang hindi nagsasama ng mga kandidato para sa pagkapangulo. Upang makakuha ng kapalit na balota sa pamamagitan ng koreo, maaaring kontakin ng mga botante ang Departamento hanggang Pebrero 25. Matapos ang petsang ito, ang mga botanteng walang idineklara na kinakatigang politikal na partido at gustong bumoto para sa kandidato sa pagkapangulo ay kailangang pumunta sa kanilang lugar ng botohan o sentro ng botohan upang humiling ng crossover na balota o muling magparehistro upang makaboto.
Ang Tatlong Sentro ng Botohan: City Hall, San Francisco State University (SFSU), at Joseph Lee Recreation Center
Puwedeng bumisita ang mga residente ng San Francisco sa sentro ng botohan upang bumoto, magrehistro para makaboto, ibigay ang pinakabago nilang impormasyon sa pagpaparehistro, o ihulog ang kanilang balotang vote-by-mail. Para sa eleksyong ito, magpapatuloy ang Departamento sa pagkakaloob ng mga serbisyo para sa eleksyon sa City Hall Voting Center, pati na rin sa SFSU at sa Joseph Lee Recreation Center. Matatagpuan ang SFSU Voting Center sa Towers Conference Center na nasa 798 State Drive. Matatagpuan ang Joseph Lee Recreation Center sa 1395 Mendell Street.
Mga Oras ng Sentro ng Botohan sa City Hall
Lunes–Biyernes, Pebrero 3–Marso 2, 8 a.m.–5 p.m.
Sabado–Linggo, Pebrero 22–23 at Pebrero 29–Marso 1, 10 a.m.–4 p.m.
Araw ng Eleksyon, Martes, Marso 3, 7 a.m. –8 p.m.
Mga Oras ng Sentro ng Botohan sa San Francisco State University (SFSU), at sa Joseph Lee Recreation Center
Sabado–Linggo, Pebrero 29–Marso 1, 10 a.m.–4 p.m.
Lunes, Marso 2, 8 a.m. –5 p.m.
Araw ng Eleksyon, Martes, Marso 3, 7 a.m. –8 p.m.
Mga Estasyon para sa Paghuhulog ng Balotang Vote-by-Mail
Simula sa Pebrero 29 at hanggang sa Araw ng Eleksyon, puwedeng gamitin ng mga botante ang mga estasyon para sa Ballot Drop-off (Paghuhulog ng Balota) upang maisauli ang kanilang balotang vote-by-mail. Matatagpuan ang mga estasyon sa labas ng tatlong sentro ng botohan at magagamit sa pareho ring oras na bukas ang mga sentro ng botohan, ayon sa nakalista sa itaas.
Gumagalang,
John Arntz, Direktor
__________________________________________________________________
1 Dr. Carlton B. Goodlett Place
City Hall, Room 48, San Francisco, CA 94102
English (415) 554-4375
Fax (415) 554-7344
TTY (415) 554-4386
中文 (415) 554-4367
Español (415) 554-4366
Filipino (415) 554-4310