I
Real Estate Transfer Tax (Buwis ukol sa Paglilipat ng Ari-arian)

Dapat bang permanenteng taasan ng Lungsod ang porsiyento ng transfer tax sa mga pagbebenta at pagpapaupa nang 35 taon o higit pa sa ari-arian, tungo sa 5.50% sa mga transaksiyon na $10 milyon hanggang $25 milyon, at tungo sa 6.00% sa mga transaksiyon na $25 milyon o higit pa, para sa tinatayang karaniwang kita na $196 milyon sa isang taon?

Buod ng Ballot Simplification Committee (Komite para Gawing mas Simple ang Balota) 

Kung Ano Ito Ngayon: Nangongolekta ang Lungsod ng transfer tax sa ilang pagbebenta, pati na rin sa mga kasunduan sa pagpapaupa (lease) na 35 taon o higit pa sa mga residensiyal at komersiyal na ari-arian sa San Francisco. Karaniwang nakabatay ang porsiyento ng buwis sa presyo ng pagbebenta ng ari-arian. Ang kasalukuyang mga porsiyento ng transfer tax ay: 

Presyo ng Pagbebenta ng Ari-arian

Kasalukuyang Porsiyento ng Buwis 

Mahigit sa $100 at mas mababa sa, o katumbas ng $250,000

0.50%

Mahigit sa $250,000 at mas mababa sa $1,000,000

0.68%

Mahigit sa $1,000,000 at mas mababa sa $5,000,000

0.75%

Mahigit sa $5,000,000 at mas mababa sa $10,000,000

2.25%

Mahigit sa $10,000,000 at mas mababa sa $25,000,000

2.75%

Hindi bababa sa $25,000,000

3.00%

Kapag sa Lungsod ibinenta ang ari-arian, hindi ipinatutupad ang transfer tax. Kapag ibinenta ang ari-arian sa kuwalipikadong nonprofit para sa abot-kayang pabahay, hindi tataas sa 0.75% ang porsiyento ng transfer tax. 

Nililimitahan ng batas ng estado ang halaga ng kita, kasama na ang kita mula sa buwis, na puwedeng magasta ng Lungsod sa bawat taon. Binibigyan ng awtorisasyon ng batas ng estado ang mga botante ng San Francisco na pahintulutan ang mga pagtataas sa limitasyong ito, para sa pinakamataas nang posibleng panahon na apat na taon.

Napupunta ang perang nakokolekta mula sa buwis na ito sa General Fund (Pangkalahatang Pondo) ng Lungsod. 

Ang Mungkahi: Tataasan ng Proposisyon I ang porsiyento ng transfer tax sa ilang pagbebenta, pati na rin sa mga kontrata ng pagpapaupa na 35 taon o higit pa sa ari-ariang may presyo na hindi bababa sa $10 milyon. Para sa ari-arian na may presyo sa pagbebenta na mas mababa sa $10 milyon, hindi magbabago ang kasalukuyang porsiyento ng buwis. Ang mga mungkahing porsiyento ng buwis ay: 

Presyo ng Pagbebenta ng
Ari-arian

Mungkahing Porsiyento
ng Buwis

Mahigit sa $100 at mas mababa sa, o katumbas ng $250,000

0.50% (walang pagbabago)

Mahigit sa $250,000 at mas mababa sa $1,000,000

0.68% (walang pagbabago)

Hindi bababa sa $1,000,000 at mas mababa sa $5,000,000

0.75% (walang pagbabago)

Hindi bababa sa $5,000,000 at mas mababa sa $10,000,000

2.25% (walang pagbabago)

Hindi bababa sa $10,000,000 at mas mababa sa $25,000,000

5.50%

Hindi bababa sa $25,000,000

6.00%

Hindi ipatutupad ang pagtataas ng porsiyento ng transfer tax kung ibebenta ang ari-arian sa Lungsod o sa kuwalipikadong nonprofit para sa abot-kayang pabahay.

Tataasan din ng Proposisyon I ang limitasyon sa paggasta ng estado sa taunang kita sa buwis ng Lungsod, batay sa halaga ng karagdagang buwis na makokolekta sa ilalim ng mungkahing mga pagtaas ng porsiyento. Tatagal nang apat na taon ang mas mataas na limitasyon. 

Ang Ibig Sabihin ng Botong “OO”: Kapag bumoto kayo ng “oo,” gusto ninyong taasan ang porsiyento ng transfer tax sa ilang pagbebenta pati na rin sa mga kontrata ng pagpapaupa na 35 taon o higit pa sa ari-ariang may presyo na hindi bababa sa $10 milyon.

Ang Ibig Sabihin ng Botong “HINDI”: Kapag bumoto kayo ng “hindi,” ayaw ninyong magawa ang mga pagbabagong ito.

Pahayag ng Controller (Tagapamahala ng Pinansiya) ukol sa "I"

Naglabas na ang Controller ng Lungsod na si Ben Rosenfield ng sumusunod na pahayag ukol sa epekto sa pinansiya ng Proposisyon I:

Tataasan ng mungkahing ordinansa ang ipinapataw na transfer tax sa ari-arian sa mga paglilipat na higit pa sa $10 milyon, at sa aking opinyon, magdudulot ito ng malaki pero lubhang nagbabago-bago na karagdagang kita para sa mga serbisyo ng gobyerno. 

Tataasan ng ordinansa ang porsiyento ng transfer tax sa mga ari-arian sa mga transaksiyon na may halagang nasa pagitan ng $10 milyon at mas mababa sa $25 milyon nang mula sa 2.75% tungo sa 5.5%, at ang porsiyento sa mga transaksiyong may halaga na $25 milyon, at mas mataas dito, nang mula sa 3% tungo sa 6%. Sa pagpapatupad ng mga porsiyento ng buwis na ito sa kasalukuyang tinatayang halaga ng ari-arian para sa mga transaksiyon na naganap sa pinakahuling siklo ng ekonomiya (mula 2008 hanggang 2020), ang taunang kita na nagresulta sana mula sa proposisyong ito ay may saklaw na sanang mababang bahagi na $13 milyon hanggang sa mataas na bahagi na $346 milyon, kung saan ang average o karaniwan ay $196 milyon. Gayon pa man, malamang na hahantong ang pagdodoble ng porsiyento ng buwis sa mga transaksiyong ito sa iba’t ibang uri ng pagkilos at gawi upang maiwasan ang pagbabayad ng buwis, at mahirap na mahulaan ang anyo at panahon ng mga ito. Posibleng makaapekto kapwa sa transfer tax at kita sa property tax (buwis sa ari-arian) ang mga pagbabago sa presyo, dami, at anyo ng transaksiyon ng pagbebenta, pati na rin ang mga epekto sa bagong konstruksiyon. 

Bagamat tinataya namin na posibleng magresulta ang mung-kahing ordinansa sa pangkaraniwan na karagdagang kita na $196 milyon kada taon, mahalagang tandaan na ito na ang pinakamagbabago-bagong mapagkukunan ng kita ng Lungsod, at posibleng hindi magamit na paraan ang mga pagtayang nakabatay sa aktibidad ng nakaraang taon upang mahulaan ang mga kita sa hinaharap. Gagawing lalo pang nagpapabago-bago ang pinagkukunan ng kita na ito ng mungkahing panukalang-batas ukol sa buwis. 

Kung Paano Napunta sa Balota ang "I"

Noong Hunyo 12, 2020, nakatanggap ang Department of Elections (Departamento ng mga Eleksyon) ng mungkahing ordinansa na pirmado ng mga sumusunod na Superbisor: Mar, Preston, Haney, Ronen, Walton. 

Pinahihintulutan ng Municipal Elections Code (Kodigo para sa Munisipal na Eleksyon) ang apat o higit pang Superbisor na maglagay ng ordinansa sa balota sa ganitong paraan.

Kailangan ng panukalang-batas na ito ng 50%+1 botong oo para maipasa.

Ang pahayag sa itaas ay walang-kinikilingang pagsusuri nitong panukalang-batas. Ang ilan sa mga salitang ginamit sa digest ng balota ay ipinaliliwanag sa Mga salitang kailangang malaman ninyo.