Mga Kandidato para sa Representative (Kinatawan) ng Estados Unidos, Distrito 15

Hindi nagsusumite ang lahat ng kandidato ng pahayag ng mga kuwalipikasyon. Makikita ang kumpletong listahan ng mga kandidato sa halimbawang balota. Kusang-loob na ibinigay ng mga kandidato ang mga pahayag at hindi isiniyasat ng anumang opisyal na ahensiya para sa kawastuhan. Inilimbag ang mga pahayag gaya ng isinumite. Hindi iwinasto ang mga maling spelling o grammar mula sa bersiyong Ingles nito. Isinalin ito sa pinakamalapit, hangga't maaari, na orihinal na teksto.

DAVID CANEPA

Ang aking trabaho ay Superbisor ng San Mateo County.

Ang aking mga kuwalipikasyon ay:

Tumatakbo si David Canepa para sa Kongreso upang ipaglaban tayo sa Washington, tulad ng nagawa na niya para sa atin sa Bay Area, partikular na sa hindi pa nagaganap kailanman na panahon ngayon, kung saan tinatanggal ng Korte Suprema ang matagal nang mga kalayaan na mayroon tayo, at ginagawang mas kaunti ng pagtaas ng presyo ng bilihin ang mga nasa panggitnang uri.

Galing si David sa pamilya ng mga imigrante, ipinanganak at pinalaki sa S.F. Peninsula, at pinaka-una sa kanyang pamilya na makapasok sa kolehiyo. Naglingkod na siya bilang mayor at bilang Presidente ng Board of Supervisors (Lupon ng mga Superbisor) sa San Mateo County, kung saan pinamunuan niya ang tungkulin ng pagwawakas sa pandemyang COVID, pagbibigay-proteksiyon sa frontline workers (mga nagtatrabaho sa mahahalagang industriya), at pagtatamo ng isa sa pinakamatataas na porsiyento ng mga bakunado sa bansa.

Makikipaglaban si David para sa progresibong mga pinahahalagahan sa pamamagitan ng pagtugon sa pagbabago ng klima, paniningil sa mayayaman at malalaking korporasyon upang pagbayarin ng makatwirang bahagi ang mga ito, at sa gayon, makapamuhunan tayo sa panggitnang uri sa pamamagitan ng mas magagandang sahod at mas abot-kayang pabahay.

Titiyakin ni David na magkakaroon ng pamamaraan ang lahat na makakuha ng abot-kaya at de-kalidad na pangangalaga sa kalusugan at makipaglaban sa mga parmasyotikong kompanya upang mapababa ang halaga ng mga inireresetang gamot. Makikipagtunggali si David upang maprotektahan ang karapatan ng kababaihan na magpasya para sa sarili, at sinusuportahan niya ang pantay na suweldo para sa kababaihan.

Si David lamang ang kandidatong tinatanggihan ang pera na mula sa mga korporasyon at nagpapatakbo ng kampanyang pinopondohan sa pamamagitan ng lokal na kolektibong pagkilos.

Kabilang sa aming mga taga-suporta ang/sina:

National Nurses United

National Union of Healthcare Workers

Frontline na mga manggagawa sa mga groseriya — Union of Food and Commercial Workers (UFCW)

Ang American Federation of State, County, and Municipal Employees (AFSCME 829)

Presidente ng San Francisco Board of Supervisors Shamann Walton

Superbisor ng San Francisco Myrna Melgar

Tagapangulo, Board of Equalization Malia Cohen

Katiwala ng San Francisco City College Alan Wong

Dating Superbisor ng San Francisco John Avalos

Samahan kami: David Canepa para sa Kongreso

David Canepa

KEVIN MULLIN

Ang aking trabaho ay Pansamantalang Tagapagsalita na Miyembro ng Asembleya.

Ang aking mga kuwalipikasyon ay:

Inendoso na ako nina Kongresista Jackie Speier, Senador Scott Wiener, Miyembro ng Asembleya Phil Ting, ng California Democratic Party (Partido Demokratiko ng California), at ng mahigit sa 100 halal na lider at lider ng komunidad para sa U.S. House of Representatives (Kongreso ng Estados Unidos).

Bakit? Dahil alam nilang mayroon na akong napatunayang rekord ng pagkakaroon ng mga resulta sa Asembleya ng Estado, na nakapagpaganda sa buhay ng mga pamilya sa distrito, at higit pa rito ang magagawa sa Kongreso. Sa Primaryang Eleksyon noong Hunyo, ako ang nakakuha ng pinakamataas na boto para sa Kongresiyonal na Distrito 15.

Sa loob ng huling dekada ng Asembleya, nakapagsulat at nakapagpasa ako ng mahigit sa 60 panukala na naging mga batas, kasama na ang unang batas para sa lahat ng eleksyon na napagbobotohan sa pamamagitan ng koreo, at ang makasaysayang DISCLOSE Act (Batas ukol sa Pagsisiwalat ng Impormasyon) at nang maipagbawal ang dark money (politikal na paggasta ng mga nonprofit) mula sa mga kampanya sa California.

Nakatulong na ako sa paghahatid ng mahigit sa $1 bilyon para sa mga proyekto sa transportasyon at sa pagsugpo sa pagtaas ng mga lebel ng tubig-dagat at sa pagbabago sa klima. Matagumpay kong naitulak ang abot-kayang pabahay, pangangalaga sa bata, at mga karapatan at kalayaan na nauukol sa reproduksiyon.

Nakapaglingkod na ako bilang Mayor, Miyembro ng Konseho at bilang may-ari ng maliit na negosyo sa distrito. Namumuhay ako at ang aking asawa at kambal na anak na lalaki nang hinaharap ang pang-araw-araw na inaalala ng mga residente ng distrito.

Dahil hindi na abot-kaya ng marami ang pabahay, at tumataas na ang halaga ng pangangalaga sa kalusugan, pangangalaga sa bata, at mataas na edukasyon, karapat-dapat kayong magkaroon ng subok nang progresibong lider na maghahatid sa inyong mga inaasahan at inaalala sa Kongreso at makikipaglaban para sa ekonomiyang gumagana para sa ating lahat.

Sa Kongreso, patuloy akong makikipaghamok para sa kinabukasan ng ating demokrasya at ng ating planeta.

Pakisamahan sina Kongresista Jackie Speier at iboto si Kevin Mullin para sa Kongreso.

KevinMullinForCongress.com

Kevin Mullin