Mga Kandidato para sa Public Defender (Pampublikong Tagapagtanggol)

Hindi nagsusumite ang lahat ng kandidato ng pahayag ng mga kuwalipikasyon. Makikita ang kumpletong listahan ng mga kandidato sa halimbawang balota. Kusang-loob na ibinigay ng mga kandidato ang mga pahayag at hindi isiniyasat ng anumang opisyal na ahensiya para sa kawastuhan. Inilimbag ang mga pahayag gaya ng isinumite. Hindi iwinasto ang mga maling spelling o grammar mula sa bersiyong Ingles nito. Isinalin ito sa pinakamalapit, hangga't maaari, na orihinal na teksto.

MANO RAJU

Ang aking trabaho ay Nanunungkulang Pampublikong Tagapagtanggol.

Ang aking mga kuwalipikasyon ay:

Bilang inyong inihalal na Pampublikong Tagapagtanggol, ibinigay ko ang aking puso at kaluluwa sa pagkakaloob sa mga taga-San Francisco ng mataas na kalidad na legal na representasyon.

Ikinararangal ko ang lalo pang pagsusulong sa pamana ng dating Pampublikong Tagapagtanggol na si Jeff Adachi sa pamamagitan ng: pagpaparami ng mga kawani sa paglilitis tungo sa mga antas na hindi pa nararanasan, pagbuo ng database ukol sa pananagutan ng pulisya, pagpapalawak ng representasyon sa imigrasyon, at pagpapasimula ng inobatibong mga proyekto na magpapalaya sa mga hindi wasto ang pagkakasentensiya sa kulungan.

Kasama sa aking matatagumpay na inisyatiba ang: pagbabayad sa mga juror o tagahatol na mababa ang kita upang higit na magkaroon ng pagkakaiba-iba sa mga tagahatol; pagtatanggal ng napakahahabang panahon para sa probasyon na pumipigil sa lalong integrasyon sa lipunan; at pagtitriple sa ating kapasidad na “linisin” ang kriminal na mga rekord– kung kaya’t magkakaroon ng mga oportunidad sa pabahay, ekonomiya, at edukasyon.

Naiangat ko ang mas maraming kababaihan at indibidwal na may kulay upang makapaglingkod sa mga posisyon ng pamumuno nang higit sa anumang panahon.

Nagmigrante ang aking mga magulang mula sa nayon ng mga magsasaka sa India. Inihanda ako ng kanilang pagmamalasakit at katapangan para sa habambuhay na pagsasakdal sa mahihirap na paglilitis ng lupon ng mga tagahatol at sa pagsasanay sa mga tagapagtanggol upang maprotektahan ng mga konstitusyunal na karapatan ng mga taga-San Francisco.

Mga Pag-eendoso:

• San Francisco Democratic Party

• San Francisco Labor Council

• San Francisco Tenants Union

• San Francisco La Raza Lawyers Association

• South Asian Bar Association of Northern California

• Rose Pak Democratic Club

• Kongresista Nancy Pelosi

• Kongresista Jackie Speier

• Mayor London Breed

• Senador Scott Wiener

• Tesorero ng California Fiona Ma

• Miyembro ng Asembleya Phil Ting

• Miyembro ng Asembleya Matt Haney

• Dating Miyembro ng Asembleya Tom Ammiano

• Dating Senador Mark Leno

• Mutsuko Adachi

Board of Supervisors:

• Presidente Shamann Walton

• Connie Chan

• Gordon Mar

• Myrna Melgar

• Aaron Peskin

• Dean Preston

• Hillary Ronen

Mga Dating Superbisor:

• Norman Yee

• Jane Kim

• Matt Gonzalez

• John Avalos

• Eric Mar

Mga Tagapamahala ng Pampublikong Tagapagtanggol:

• Patricia Lee

• Dating Komisyoner ng Pulisya Angela Chan

• Jacque Wilson

• Sandy Feinland

Votemano.com

Mano Raju

REBECCA SUSAN FENG YOUNG

Ang aking trabaho ay Abugado ng Batas Kriminal.

Ang aking mga kuwalipikasyon ay:

Bilang anak na babae ng unang henerasyon na Tsinong ama, lumaki ako sa Harlem at sa maliit na bayan sa New York. Ang hindi matwid na pagturing at pagbubukod na naranasan ng aking pamilya ang nagpatibay sa aking dedikasyon sa katarungan at pagkakapantay-pantay para sa iba’t ibang lahi.

Sa pamamagitan ng inyong boto, ako ang magiging unang babae at unang Tsino-Amerikano na mahahalal bilang Pampublikong Tagapagtanggol ng San Francisco. Ikinararangal ko ang pagkakataon na muling pasiglahin ang mga pamantayan para sa kahusayan kung saan karapat-dapat ang San Francisco.

Magmula noong magtapos ako sa Golden Gate University Law School, itinuon ko na ang sarili sa pagtatanggol sa pinakabulnerable sa San Francisco — 16 taon sa pribadong pagtatrabaho, at 19 sa Opisina ng Pampublikong Tagapagtanggol. Nakapaglitis na ako ng 60+ kaso, naging kasamang tagapamahala ng 52 abugado para sa mga krimen, at tumulong sa paggawa ng rebolusyonaryong mga pagbabago sa Opisina ng Pampublikong Tagapagtanggol ng San Francisco sa ilalim ni Jeff Adachi. Inilunsad ko ang Bail & Homicide Units (Mga Unit para sa Pagpipiyansa at Pagpatay) at gumawa ng inobatibong mga programa upang masuportahan ang mga kliyente at malabanan ang kawalan ng katarungan batay sa lahi.

Sa kasalukuyan, ginagawang mga tagapamahala ang nakababatang mga abugado ng beteranong mga abugado para sa paglilitis, na nahihirapan na dahil sa labis na pagtaas ng bilang ng mga kaso. Naglaho na ang kabukasan sa pagsisiyasat at katarungan sa pagkakapantay-pantay. Nagkaroon ng napakalaking hidwaan sa opisina. Ano ang naging resulta nito? Naging demoralisado at hindi na handa ang mga abugado at kawani. Kulang na sa makatwirang representasyon ang mga miyembro ng ating komunidad.

Tumatakbo ako na Pampublikong Tagapagtanggol upang makagawa ng malalim at pangmatagalang pagbabago. Ang malawak kong karanasan sa paglilitis, pamamahala, paggabay, at sa polisiya ang muling magpapanibago sa pagkakaroon ng pagkakaiba-iba sa Opisina, magtitiyak ng katarungan sa pagkakapantay-pantay mula sa loob, at magpapanumbalik sa malakas na representasyon para sa ating komunidad.

Rebeccayoung4publicdefender.com

Inendoso ni:

Geoffrey Francis Brown, Pampublikong Tagapagtanggol ng San Francisco, 1978-2001

Rebecca Susan Feng Young