Mga Kandidato para sa Board of Supervisors (Lupon ng mga Superbisor), Distrito 7

Hindi nagsusumite ang lahat ng kandidato ng pahayag ng mga kuwalipikasyon. Makikita ang kumpletong listahan ng mga kandidato sa halimbawang balota. Kusang-loob na ibinigay ng mga kandidato ang mga pahayag at hindi isiniyasat ng anumang opisyal na ahensiya para sa kawastuhan. Inilimbag ang mga pahayag gaya ng isinumite. Hindi iwinasto ang mga maling spelling o grammar mula sa bersiyong Ingles nito. Isinalin ito sa pinakamalapit, hangga't maaari, na orihinal na teksto.

JOEL ENGARDIO

Ang aking trabaho ay Mamamahayag.

Ang aking mga kuwalipikasyon ay:

Independiyenteng boses ang kinakailangan upang papanagutin ang City Hall para sa malilinis na kalye, mas kaunting krimen, at mas mahuhusay na serbisyo.

Nakapagtrabaho na ako bilang mamamayahag at taga-adbokasya para sa komunidad sa loob ng 22 taon sa San Francisco. Ang aking kolum sa Examiner, na nanalo na ng mga karangalan, at ang aking pamumuno sa mga grupong tulad ng Stop Crime SF (Itigil ang mga Krimen SF) ay nagdulot ng pagbabago sa batas at nakagawa ng mga resulta.

Nakatuon ako sa pagtulong sa mga pamilya na makayanan ang pamumuhay sa San Francisco at maramdamang ligtas sila. Kailangang ihinto na ng City Hall ang hindi pagpansin sa ating mga pangangailangan pagdating sa pabahay, mga paaralan, at kalidad ng buhay.

Gusto kong maging mas madali ang pagpasok sa paaralan sa komunidad at ang pagbubukas ng maliit na negosyo. Gusto kong makapagrekrut ng mas maraming pulis at tiyakin na sineseryoso ang krimen. Gusto kong i-audit ang bawat programa ng lungsod at iyon lamang gumagana ang bayaran.

Matapos ang coronavirus na pandemya, hindi na tayo makababalik sa dati nating mga ginagawa. Hindi na mapananatili pang epektibo ang pagsandig sa mga residente upang sila ang maging ATM o napagkukunan ng pondo ng City Hall. O ang pagtulak sa maliliit na negosyo hanggang sa mawala na ang mga ito nang dahil sa labis-labis na singil at permit.

Tumatakbo ako para maging superbisor upang magdala ng responsable at may pananagutang pamumuno sa City Hall. Naniniwala akong ang pinakamagagandang araw ng San Francisco ay nasa hinaharap – kung susuungin natin ang ating mga problema nang may inobasyon at sentido komun.

Alamin pa ang tungkol dito sa engardio.com

Joel Engardio

STEPHEN MARTIN-PINTO

Ang aking trabaho ay Bumbero / Reserbista sa Militar.

Ang aking mga kuwalipikasyon ay:

Ikinatutuwa ba ninyo ang gobyerno ng lungsod at sa palagay ba ninyo ay dinadala tayo nito sa tamang direksiyon? Gumanda ba ang kalidad ng buhay ninyo nitong nakaraang ilang taon? Pakiramdam ba ninyo ay ligtas kayo sa kalye o maging sa inyong bahay? May pananalig ba kayo na alam ng San Francisco kung paano lulutasin ang mga problema na ito o na mayroon man lamang itong political will o determinasyon na magkaroon ng kahihinatnan ang mga ginagawa?

Ang pangalan ko ay Stephen Martin-Pinto, at sa sandaling manungkulan ako, magtatrabaho ako upang muling papanagutin sa mga mamamayan ang gobyerno ng lungsod. Magkakaroon ako ng polisiyang zero-tolerance o walang palalampasin sa krimen. Palalawakin ko ang MUNI Metro light rail sistem. Tatapyasan ko ang mga singil sa maliliit na negosyo. I-o-audit ko ang mga ahensiya ng gobyerno upang makita ang nasasayang na gastos at labanan ang korupsiyon. Mag-eempleyo ako ng mas maraming opisyal para sa pampublikong kaligtasan upang maging mas ligtas ang San Francisco. Magdadala ako ng karanasan sa pamumuno na nakuha ko mula sa panahong ginugol bilang opisyal ng Marine Corps, bumbero, union tradesman (naka-unyong manggagawa na may espesipikong kakayahan), at lider ng komunidad. Wala nang iba pang kandidato na mayroong malalim at maraming iba’t ibang uri ng karanasan sa buhay na tulad ko. Isa akong natibong taga-San Francisco at apo ng mga imigrante mula sa Ecuador. Ikararangal kong maging inyong susunod na superbisor. Hayaan ninyong mapatunayan ko sa inyo na ang lungsod na dati nang alam kung paano ang paggana, ay alam pa rin kung paano. Salamat po.

Stephen Martin-Pinto

BEN MATRANGA

Ang aking trabaho ay Direktor para sa Katarungan sa Pagkakapantay-pantay sa Teknolohiya.

Ang aking mga kuwalipikasyon ay:

Ipinanganak ako at pinalaki sa komunidad na ito, at bilang Superbisor, magtatrabaho ako araw-araw para sa mga pamilyang nasa panggitnang uri, at ibabalik ang independiyenteng pamumuno. Ang aking mga prayoridad ay:

• Pamumuno sa ating tugon sa COVID-19 upang maprotektahan ang pampublikong kalusugan at masuportahan ang pagbangon ng maliliit na negosyo

• Pagpigil sa mga pagbabawas sa mga paaralan sa komunidad

• Pagtitiyak na lahat ng nangangailangan ng de-kalidad na trabaho ay makahahanap nito

• Pagpapanatili sa San Francisco na abot-kaya para makapanirahan tayong lahat dito

• Pagharap sa kawalan ng tahanan: pagtulong sa mga beterano, pamilya, at indibidwal na may mga hamon sa kalusugan ng isip

• Pagtutuon ng mga rekurso para sa pampublikong kaligtasan tungo sa pag-iwas sa krimen

Nagkakilala kami ng aking asawa noong high school sa St. Ignatius at ngayon, pinalalaki namin ang aming anak na babae sa West Portal. Ang aking karanasan ang nagbibigay sa akin ng natatanging kuwalipkasyon upang katawanin tayo sa City Hall:

• Direktor para sa Katarungan sa Pagkakapantay-pantay sa Teknolohiya –kumokonekta sa mga residente, na may kasaysayan na hindi lubos na nakatatanggap ng mga serbisyo, sa mabilis o high-speed na Internet , at nang sa gayon, makapag-aral at makapagtrabaho tayong lahat mula sa magkakalayong lugar.

• Direktor para sa Kaligtasan ng mga Kalye ni Mayor Ed Lee – pamamahala sa plano para sa kaligtasan na Vision Zero, kung saan nakapaghatid ng 13 milya ng mga pagpapahusay, at nakalikha ng daan-daang trabaho sa konstruksiyon.

• Lider sa komunidad – tumutulong sa pamumuno sa Matatag na Pagtugon ng West Portal sa COVID-19.

Aktibo rin ako sa ating komunidad:

• Miyembro, St. Brendan’s Catholic Church

• Delegado, West of Twin Peaks Central Council (Sentral na Konseho ng West of Twin Peaks)

• Miyembro ng Lupon, Greater West Portal Neighborhood Association (Asosasyon ng Komunidad ng Greater West Portal)

Pakisamahan ang Tesorero ng Estado ng Califonia na si Fiona Ma at ang daan-daang kapitbahay sa pagsuporta sa ating kampanya.

May mga tanong ba kayo? Bisitahin ang www.benmatranga.com o direktang tawagan ako: 415-484-5870.

Ben Matranga

MYRNA MELGAR

Ang aking trabaho ay Tagaplano sa Lungsod.

Ang aking mga kuwalipikasyon ay:

Tumatakbo ako para maging Superbisor dahil kailangan ng Westside ng independiyenteng lider na ilalagay ang mga tao sa unahan ng politika at makagagawa ng mga bagay-bagay sa City Hall. Napamunuan ko na ang matatagumpay na inisyatiba para sa pabahay at pagpapaunlad sa ekonomiya, at handa akong magtrabaho nang husto para sa ating mga komunidad bilang inyong Superbisor.

Mayroon akong graduate degree sa Urban Planning na may konsentrasyon sa pabahay mula sa Columbia University. Habang nagtatrabaho ako noon para kay Mayor Gavin Newsom, lumikha ako ng bagong mga programa para sa pagmamay-ari ng tahanan para sa mga guro at pamilya. Nakapagpatakbo na ako ng mga nonprofit na nagbigay ng suporta sa maliliit na negosyo at pag-unlad ng mga bata. Bilang Komisyoner sa Pagpaplano, binalanse ko ang pangangailangang panatilihin ang karakter ng komunidad sa pangangailangang magpanatili at magtayo ng mas maraming pabahay.

Alam ko kung paano pagaganahin ang City Hall para sa atin at ipagsasama-sama ko ang mga tao upang:

- Masuong ang kawalan ng tahanan, malipat ang mga tao mula sa ating mga kalye at mapagkalooban sila ng kailangang-kailangan na pangangalaga

- Makalikha ng mas maraming pabahay para sa lahat ng antas ng kita – matatanda, mga guro, pamilya, first reponders (unang tumutugon)

- Makatulong sa pagbangon ng mga negosyo sa komunidad

- Matiyak na ligtas at malinis ang ating distrito, napananatili sa maayos na kondisyon ang ating mga parke, at masigla at matatag ang ating mga komunidad.

Ikinararangal kong magkaroon ng suporta nina:

Superbisor Norman Yee

Miyembro ng Asembleya David Chiu

Dating Abugado ng Distrito Suzy Loftus

Presidente ng City College Shanell Williams

Marami pa sa MyrnaMelgar.com

Myrna Melgar

EMILY MURASE

Ang aking trabaho ay Direktor ng Ahensiya sa Lungsod at County.

Ang aking mga kuwalipikasyon ay:

Isa akong NAPATUNAYAN NANG LIDER.

Bilang Presidente ng San Francisco Board of Education (Lupon ng Edukasyon), nakipaglaban ako upang mapanatili ang programang JROTC para sa mga estudyanteng nagpahayag na gustong-gusto nilang makalahok dito. Bilang Direktor ng ahensiya ng lungsod sa loob ng mahigit sa 15 taon, nakipaglaban ako upang matanggal na ang pandarahas sa tahanan at wakasan ang human trafficking o pangangalakal sa tao rito sa San Francisco.

May pangako akong PANATILIHIN, PROTEKTAHAN, at PAGHUSAYIN ang kalidad ng buhay sa Distrito 7 sa pamamagitan ng pagpapatuloy sa katangian ng pagkakaiba-iba sa marami sa ating mga komunidad at pagpapalakas ng mga boses sa komunidad.

SAMA-SAMA, ating:

• Gagawing Mas Ligtas ang Ating mga Komunidad

• Susuportahan ang mga Negosyo sa ating Komunidad

• Wawakasan ang Pagkakampo ng mga Homeless o Walang Tahanan

• Pararamihin ang Abot-kayang Pabahay/Pagmamay-ari ng Tahanan

• Palalawakin ang Paglikha ng mga Trabaho.

Nangangako akong pagkakalooban kayo, ang inyong pamilya, mga kapitbahay at mga negosyante ng ating Distrito ng PINAKAMAHUHUSAY NA POSIBLENG MGA SERBISYO. Walang kapaguran akong makikipaglaban para sa mga inaalala ng ating mahigit sa 40 komunidad sa Westside.

MGA PAG-ENDOSO

Tesorero ng Estado Fiona Ma (pangalawa)

Miyembro ng Asembleya Phil Ting

Sheriff Paul Miyamoto

Miyembro ng Lupon ng mga Paaralan Rachel Norton

Katiwala ng City College Thea Selby (pangalawa)

Dating Superintendente ng mga Paaralan Gwen Chan

Dating Sheriff Vicki Hennessy (pangalawa)

Hukom (retirado) at Dating Superbisor Quentin L. Kopp

Dating Direktor ng Department of Emergency Management (Departamento para sa Pamamahala ng mga Emergency) Anne Kronenberg

Tagapagtaguyod ng Pampublikong Kaligtasan Suzy Loftus (pangalawa)

Tagapagtatag na Presidente ng United Educators of San Francisco (Nagkakaisang mga Edukador sa San Francisco) Joan-Marie Shelley

www.EmilyMurase.com

Emily Murase

VILASKA NGUYEN

Ang aking trabaho ay Abugado para sa mga Kriminal na Paglilitis.

Ang aking mga kuwalipikasyon ay:

Panahon na upang ilagay natin sa unahan ang mga pamilya.

Naging abugado na ako para sa mga kriminal na paglilitis sa loob ng 15 taon. Ibinuhos ko ang aking karera sa pagtiyak na napoprotektahan ng batas ang mga pamilya.

Lumikas ang aking mga magulang mula sa mga komunista noong Fall of Saigon (Pagbagsak ng Saigon). Naniwala ang aking ama sa masipag na pagtatrabaho at sa American dream (pangarap na magtatagumpay ang sinuman sa Amerika), kung kaya’t matapos makakuha ng visa, nagmigrante ang aking pamilya sa dakilang estado ng Alaska. Noong ipinanganak ako, ibinigay nila sa akin ang pangalan na mula sa salitang Inuit para sa “Mainland (malaki at pangunahing isla).”

Ikinararangal kong maging Ama sa komunidad, na nagpapalaki ng dalawang bata rito sa Westside at nagko-coach sa basketball sa paaralan ng aming mga anak. Ipinaalala sa atin ng pandemya kung gaano kahalaga ang bawat uri ng pamilya sa lungsod. Kung wala ang malalakas at malulusog na pamilya, hindi tayo magkakaroon ng malakas at malusog na lungsod.

Iyan ang dahilan kung bakit bilang Superbisor, masipag akong magtatrabaho upang muling maitayo ang ekonomiya ng ating lungsod, dalhin ang mga rekurso sa mga pamilya ng Westside at itigil na ang laro na pass-the-buck (pagpasa sa iba ng responsibilidad) na humantong sa krisis sa mga homeless o walang tahanan.

Hindi ako insider o tagaloob sa city hall. Gayon pa man, ikinararangal kong ma-endoso ng mga lider ng lungsod na ito, at ng libo-libong pamilya sa komunidad na gustong makita ang ating lungsod na mas mahusay ang ginagawa.

Dating Miyembro ng Asembleya Tom Ammiano

Tagapangulo ng Democratic Party (Partido Demokratiko) David Campos

Superbisor Matt Haney

Superbisor Hillary Ronen

Komisyoner ng Pulisya Petra DeJesus

Komisyoner ng Pulisya Cindy Elias

Komisyoner ng Pulisya John Hamasaki

Vilaska Nguyen

KEN PIPER

Ang aking trabaho ay May-ari ng Negosyo.

Ang aking mga kuwalipikasyon ay:

Kaligtasan, Komunidad, Pampublikong Transportasyon.

Lumipat kami ng aking asawa sa San Francisco 25 taon na ang nakararaan. Nagpapalaki kami ng tatlong anak na pumapasok sa mga pampublikong paaralan. Pinaunlad namin ang aming mga karera at nagtatag ng matibay na komunidad sa loob ng ating lungsod. Nakatira na kami sa maraming komunidad at nakasakay na sa bawat linya ng MUNI, at sa wakas ay nag-ugat kami sa Westwood Park 13 taon na ang nakararaan.

Maraming malalaking pagbabago na ang naganap, bagamat hindi para sa ikabubuti ang lahat ng ito. Dumarami na ang matatayog na gusali at mga bagong negosyo – habang lumalaki naman ang kawalan ng tahanan, nabawasan ang pagkakaroon ng pagkakaiba-iba, mas marumi na ang lungsod, at mas hindi na abot-kaya ang pamumuhay.

Magtatrabaho ako upang matiyak na magiging mas napupuntahan ang mga lugar ng lungsod, mas inklusibo o bukas ito sa lahat, at mas abot-kaya ang pamumuhay. Natatangi ang Distrito 7 dahil sa pagkakaroon nito ng mga pagkakaiba-iba at sa pinagtutuunan ng komunidad. Kailangang maging ligtas na lugar ito para sa pamumuhay, pagtatrabaho, at pagreretiro, kung saan makatuwirang nakukuha ang lahat ng naihahandog ng lungsod. Gayon pa man, tinanggal na ng mga lider ng lungsod ang mga daanan sa kalye at nagdagdag ng mga panukalang-batas, kung kaya’t malaki ang inihaba ng pagbibiyahe sa Distrito 7.

Paparating na ang malalaking pagtatapyas sa badyet. Malalaki kung gumasta ang ating kasalukuyang mga superbisor. Isa akong mahusay at nakikipagkolaborasyong lider na may napatunayan nang karanasan sa negosyo. Natiyak na ng trabaho ko sa mga kompanya sa SF ang mga pagbabago sa operasyon na mahusay ang pagpipinansiya, kung kaya’t mapahihintulutan ang pangmatagalang tagumpay. Bahagi ako ng susunod na henerasyon ng mga lider, at hinihingi ko ang inyong boto.

PiperD7.com

Ken Piper