Mga Kandidato para sa Board of Supervisors (Lupon ng mga Superbisor), Distrito 5

Hindi nagsusumite ang lahat ng kandidato ng pahayag ng mga kuwalipikasyon. Makikita ang kumpletong listahan ng mga kandidato sa halimbawang balota. Kusang-loob na ibinigay ng mga kandidato ang mga pahayag at hindi isiniyasat ng anumang opisyal na ahensiya para sa kawastuhan. Inilimbag ang mga pahayag gaya ng isinumite. Hindi iwinasto ang mga maling spelling o grammar mula sa bersiyong Ingles nito. Isinalin ito sa pinakamalapit, hangga't maaari, na orihinal na teksto.

VALLIE BROWN

Ang aking trabaho ay Tagapayo ng Programa sa Nonprofit.

Ang aking mga kuwalipikasyon ay:

Para makabangon mula sa krisis na ito, kailangan natin ng pamumuno na malikhain, nakatutugon agad, at nakikipagkolaborasyon.

Naging bahagi na ako ng komunidad na ito sa loob ng 25 taon. Bilang organisador sa komunidad, naranasan ko ang krisis sa AIDS at ang karahasan sa lugar. Bilang kawani ng City Hall, nakatulong ako sa pagpasa ng mahihirap na badyet sa panahon na bagsak ang ekonomiya. Noong nahalal si Superbisor London Breed bilang mayor, tumindig ako upang makapaglingkod bilang Superbisor ng Distrito 5 at makapasa ng batas ukol sa kawalan ng tahanan, katarungan sa pagkakakantay-pantay ng mga lahi o racial equity, abot-kayang pabahay, at mga karapatan ng kababaihan sa reproduksiyon. Lumaki akong mahirap, at naulila sa magulang noong bata pa lamang ako, kung kaya’t alam ko ang ibig sabihin ng pakikibaka sa buhay.

Naipakita ko nang kaya kong ipaglaban ang ating komunidad at ipagsama-sama ang mga tao para sa kolektibong pagkilos. Mayroon akong plano para sa Distrito 5:

• Tulungan ang maliliit na negosyong maibalik ang kasiglahan sa komunidad

• Tulungan ang bulnerableng mga komunidad sa pagkain, pabahay, pangangalaga sa bata at mahahalagang pangangailangan

• Muling pag-isipan ang mga pampublikong espasyo upang ligtas na makapagsama-sama

• Muling patakbuhin ang Muni at bawasan ang kasikipan para sa kaligtasan

• Tigilan na ang pagdadahilan sa pabahay — ang Distrito 5 ay para sa lahat

• Ituring ang kawalan ng tahanan bilang pampublikong krisis sa kalusugan sa pamamagitan ng ligtas na mga matutuluyan

• Igiit ang pagkakaroon ng makabuluhang pantay at walang kinikilingang pagtrato sa lahat ng lahi o racial justice at magkaroon ng mga reporma sa pulisya

Nakaharap na ang San Francisco sa trahedya at palagi itong nakabalik nang mas malakas kaysa sa noon. Naranasan ko na ito sa aking buhay at magagawa ko ito para sa Distrito 5.

Vallie Brown

www.votevallie.com

DANIEL LANDRY

Ang aking trabaho ay Direktor, Nonprofit sa Sining.

Ang aking mga kuwalipikasyon ay:

Ipinanganak ako at lumaki sa D-5 sa co-op na bahay para sa mabababa ang kita sa komunidad ng Fillmore. Matapos lumaki sa kahirapan at mapasok sa gulo noong ako’y tinedyer, nagdesisyon akong baguhin ang aking buhay, at nang makapagbigay pabalik sa komunidad sa pamamagitan ng pagiging tagapagtaguyod/aktibista sa loob ng 27 taon na ngayon. Kasalukuyan akong nag-aaral ng Political Science sa CCSF. At, ako rin ang tagapagtatag at direktor ng SF CATS Academy.

Ilan sa aking karanasan sa nakaraan ang paglikha ng Prop. F na inisyatiba para sa abot-kayang pabahay sa Bayview noong 2008, pagiging miyembro ng (RAB) sa US Navy, pagiging tagapag-ugnay sa programang NERT ng SF Fire Dept, at pagiging miyembro ng Citywide Community Policing Relations Board (Pangkabuuan ng Lungsod na Lupon para sa Pakikipag-ugnay ukol sa Pagpapatakbo ng Pulisya nang may Pakikipagtulungan sa Komunidad). Naging Miyembro din ako ng Justice for Mario Woods Coalition (Koalisyon sa Paghingi ng Hustisya para kay Mario Woods) noong 2016.

Kasama sa aking mga prayoridad ang:

• Kalidad ng buhay para sa lahat ng taga-San Francisco

• Pangangalaga sa kalusugan, kalusugan ng isip, at kawalan ng tahanan

• Pagkontrol sa upa, abot-kayang pabahay, mga may-ari ng tahanan

• Kaligtasan, panloloob sa mga sasakyan, at transportasyong MUNI

• Pagsasaayos ng maliliit na negosyo mula sa COVID-19

Bilang Superbisor, ako ay:

• Magpaparami ng Foot Patrols (mga nagpapatrolya sa paligid na mga pulis) ng SFPD

• Lilikha ng D-5 na tagapayong lupon

• Magkakaroon ng polisiyang bukas lagi ang pintuan

• Magdadala ng mga mapagkukunan ng tulong at impormasyon sa maliliit na negosyo

Magalang kong hinihingi ang inyong boto.

Daniel B. Landry

www.daniellandry2020.com

NOMVULA O’MEARA

Ang aking trabaho ay Organisador at Aktibista, Producer ng Pelikula.

Ang aking mga kuwalipikasyon ay:

Isa akong ina ng tatlong bata na pinalaki ko sa San Francisco. Mayroon akong Bachelors in Creative Writing English Literature, mula sa University of Cape Town sa South Africa at nag-aral ako ng MFA in Motion Picture and Television sa isang Unibersidad sa San Francisco. Ang aking trabaho bilang independiyenteng producer ng pelikula ang higit na nagbigay kaalaman sa aking perspektiba at pagkaunawa sa mga hamon na karaniwan sa maraming umuupa. Isa akong renter o umuupa nitong nakaraang 21 taon. Nagkaroon na rin ako ng personal na karanasan sa homelessness o kawalan ng tahanan, hindi dahil sa anumang kapabayabaan, kundi dahil sa biglaang pagkawala ng trabaho. Noong panahong iyon, inilagay kami sa shelter para sa homeless. Sa kalaunan, nakahanap din kami ng pabahay. Alam ko nang personal ang mga hamon na hinaharap ng mga umuupa dahil sa patuloy na nagbabadyang banta ng hindi makatarungang pagpapaalis. Sa lungsod kung saan palaging pinagbabantaan ang ating kakayahan na panatilihing mayroong bubong na masisilungan. Hindi tayo nabibigyan ng katiyakan na mayroong katatagan ang pagpapanatili ng pabahay sa harap ng hindi makatwirang pagpepresyo at kasakiman ng mga korporasyon. Gusto kong lumaban tayo at palakasin ang karapatan ng mga umuupa, humanap ng pabahay para sa homeless at sa populasyon ng mga may sakit sa pag-iisip. Sama-sama, at nagkakaisa, kaya nating maabot ang ating mga tunguhin. Magalang ko pong hinihiling ang inyong boto sa balota sa Nobyembre 2020.

Nomvula O’Meara

DEAN PRESTON

Ang aking trabaho ay Superbisor.

Ang aking mga kuwalipikasyon ay:

Dalawampu’t apat (24) na taon na akong residente ng Distrito 5 at may dalawang anak na nasa mga pampublikong paaralan ng San Francisco. Ang aking mga patuloy na prayoridad bilang inyong Superbisor ay:

• Paglilingkod sa mga pangangailangan ng distrito at mga residente ng lungsod sa panahon ng pandemya

• Pagpigil sa mga pagpapaalis sa tirahan at paglikha ng abot-kayang pabahay

• Pagtugon sa kawalan ng tahanan

• Mas mahusay na Muni at pampublikong transportasyon

• Malulusog na komunidad at mas matitibay na lokal na maliliit na negosyo

• Pagtataguyod sa pangangasiwa at pagkakaroon ng pananagutan ng pulisya

Magmula nang manungkulan ako noong Disyembre, nakagawa na tayo ng malalaking pag-unlad:

• Namobilisa ang daan-daang boluntaryo upang matugunan ang mga pangangailangan ng matatanda at nahihirapang mga residente sa panahon ng pandemyang COVID-19

• Naipagbawal ang pagpapaalis sa mga umuupa na hindi makabayad sa upa

• Nailipat ang mga pamilyang walang tahanan na nasa Distrito 5 mula sa hindi ligtas na shelter tungo sa mga hotel gamit ang mga pribadong donasyon

• Nakipagtrabaho sa lungsod at mga kapitbahay upang makalikha ng lugar para sa Safe Healthy Sleeping (Ligtas na Pagtulog na Mabuti sa Kalusugan)

• Natutulan ang pagtataas ng pamasahe sa Muni sa gitna ng pandemya

• Nakapagtrabaho upang magkaloob ng pagkokontrol sa upa sa mga residente ng Midtown

Ikinararangal kong ma-endoso ng United Educators of San Francisco (Nagkakaisang mga Edukador sa San Francisco), California Nurses Association (Asosasyon ng mga Nars ng California), Sierra Club, San Francisco Tenants Union (Unyon ng mga Nangungupahan sa San Francisco), Affordable Housing Alliance (Alyansa para sa Abot-kayang Pabahay), ILWU, NUHW, SEIU 2015, Unite Here! Lokal 2, Mga Superbisor Peskin, Mar, Haney, Ronen, Mandelman at Walton, Miyembro ng Asembleya Phil Ting, at iginagalang na mga lider ng lungsod Tom Ammiano, Mark Leno, Art Agnos, David Campos at Jane Kim.

Dean Preston