Mga Kandidato para sa Board of Education (Lupon ng Edukasyon)

Hindi nagsusumite ang lahat ng kandidato ng pahayag ng mga kuwalipikasyon. Makikita ang kumpletong listahan ng mga kandidato sa halimbawang balota. Kusang-loob na ibinigay ng mga kandidato ang mga pahayag at hindi isiniyasat ng anumang opisyal na ahensiya para sa kawastuhan. Inilimbag ang mga pahayag gaya ng isinumite. Hindi iwinasto ang mga maling spelling o grammar mula sa bersiyong Ingles nito. Isinalin ito sa pinakamalapit, hangga't maaari, na orihinal na teksto.

ALIDA FISHER

Ang aking trabaho ay Nag-aadbokasiya para sa Espesyal na Edukasyon.

Ang aking mga kuwalipikasyon ay:

Bilang nag-aadbokasiya para sa espesyal na edukasyon, dating tagapangalagang magulang, at ina ng apat na batang Aprikano Amerikano, napakapersonal para sa akin ng mga usaping nauukol sa katarungang panlipunan at katarungan sa pagkakapantay-pantay.

Mahigit 15 taon na akong aktibong miyembro para sa pamamahala sa antas ng mga paaralan at ng distrito. Nakalahok na ako sa mga PTA at SSC sa walong paaralan, at karagdagan dito, sa mga komite at nagtatrabahong pangkat sa antas ng distrito. Gayon pa man, ang karanasan ko sa pagtatrabaho upang makakuha ng mga serbisyo para sa sarili kong mga anak ang siyang nakapagpanibago sa akin mula sa pagiging aktibong magulang tungo sa pagiging aktibistang magulang.

Ginugugol ko ang aking mga araw nang nakikipaglaban katabi ng mga pamilya, at nang matulungan ang mga estudyanteng magtagumpay sa paaralan. Araw-araw, nakikita ko kung paano naisasantabi ng mga paaralan ang mga indibidwal na iba kung mag-isip at matuto. Karapatang sibil ang edukasyon - makagagawa tayo ng mas mabuti kaysa rito!

Ang aking mga prayoridad

• Suportahan ang mga kawani ng SFUSD: ayusin ang sistema ng pagpapasuweldo; punan ang mga bakanteng posisyon sa kawanihan; mamuhunan sa propesyonal na pag-unlad

• Dalhin ang ating kurikulum sa pagbabasa at kung paano tayo nagbabasa sa ika-21 siglo

• Lumikha ng badyet na sumasalamin sa mga pinahahalagahan natin: higit na magkaroon ng pagpapanagot at kabukasan sa pagsisiyasat sa paggawa ng mga desisyon; tiyakin na sinasalamin ng ating badyet ang mga pangangailangan ng ating mga estudyante

Mga pag-eendoso:

United Educators of San Francisco

Board of Supervisors:

• Shamann Walton, Presidente

• Gordon Mar

• Myrna Melgar

• Hillary Ronen

San Francisco Democratic County Central Committee

• John Avalos

• Keith Baraka

• Gloria Berry

• David Campos

• Bevan Dufty

• Peter Gallotta

• Li Miao Lovett

• Faauuga Moliga

• Carolina Morales

• Mano Raju

• AJ Thomas

• Shanell Williams

• Han Zou

Alamin pa ang tungkol dito sa www.alidafisher.com

Alida Fisher

KAREN FLESHMAN

Ang aking trabaho ay Edukador sa Dibersidad at Inklusiyon.

Ang aking mga kuwalipikasyon ay:

Isa akong boluntaryong magulang ng SFUSD, nagtapos sa pampublikong paaralan, anak na babae ng retiradong edukador, may-ari ng maliit na negosyo, at abugado. Mahal ko ang mga paaralan ng aking mga anak at gusto kong pagsimulan at pagyamanin ang lahat ng mabuti sa SFUSD sa pamamagitan ng pakikinig, pagtutulay, at paglutas sa mga problema. Kailangan natin ng ligtas at positibong mga paaralan sa bawat komunidad, kung saan nagkakaloob ng matataas na inaasahan at malalaking suporta para sa lahat ng kabataan, pamilya, at edukador.

Sa loob ng 20+ taon, nakapagtrabaho na ako para sa lokal na mga ahensiya ng gobyerno at nonprofit upang maihanda ang kabataan sa tagumpay sa kolehiyo, karera, at buhay, at naging gabay na ako sa marami. Nabigyang-inspirasyon ako ng aking mga ginabayan upang maging edukador sa dibersidad at inklusyon, na tumutulong upang mabago ng mga lugar sa pagtatrabaho ang kanilang kultura, at sa gayon ay maging ligtas at positibo ang mga ito para sa lahat.

Dadalhin ko ang aking karanasan upang matiyak na uunlad ang bawat estudyante ng SFUSD, at magtatapos nang handa para sa kolehiyo o karera.

Upang makarating doon, kailangang magsimula tayo nang maaga, kung saan nag-eenroll ang lahat ng estudyante sa transisyonal na kindergarten, nagbabasa sa antas ng grado sa elementarya, handa na para sa high school pagdating ng ika-walong grado, at sinusuportahan magmula sa ika-siyam na grado hanggang sa pagtatapos sa pamamagitan ng indibidwalisadong plano para sa kanilang hinaharap, may bayad na trabaho sa tag-araw, at mga aktibidad para sa pagpapayaman ng kaalaman.

Ang aking mga prayoridad:

• Pamumuhunan sa akademiko at sosyo-emosyonal na kagalingan ng mga estudyante at edukador

• Pagkakaloob ng kabukasan sa pagsisiyasat at pananagutan sa pagbabadyet

• Pagtataguyod ng paggawa ng mga desisyon nang may kolaborasyon

Pagkakaisa ng San Francisco para sa San Francisco Unified

karenforsfschools.com

Karen Fleshman

ANN HSU

Ang aking trabaho ay Itinalagang Miyembro, Board of Education.

Ang aking mga kuwalipikasyon ay:

Bilang miyembro ng SF School Board, may pananagutan ako sa pagtamo ng tagumpay ng mga estudyante at sa akademikong kahusayan, ligtas na mga paaralan, at kahusayan sa pagpapatakbo. Ina ako ng kambal na lalaki na naka-enroll sa SFUSD, at makaraang yumao ang aking ama at asawa sa panahon ng pandemya, inilaan ko na ang aking oras, enerhiya, mga kakayahan, at rekurso tungo sa pagtugon sa mga kabiguan ng ating sistema ng pampublikong paaralan.

Magmula noong itinalaga ako ni Mayor Breed sa School Board noong Marso 2022, nakapagtrabaho na ako upang:

- maipasa ang balanseng badyet at bawiin ang halos lahat ng mga pag-aabiso ukol sa pagkakatanggal sa trabaho

- makapag-empleyo ng superintendenteng nakatuon sa mga estudyante

- muling magkaroon ng pagtanggap na nakabatay sa mga pamantayan sa Lowell High School

- pagwawakas sa pag-apela sa kaso sa hukuman na nauukol sa Washington mural

- paglikha ng task force (pangkat para sa espesyal na gawain) sa high school at sa gayon ay matiyak ang pamamahagi ng mga rekurso sa kabuuan ng distrito nang may katarungan sa pagkakapantay-pantay

- mapamunuan ang pagsusumikap na maibalik ang JROTC sa Balboa, Mission, at Galileo nang walang karagdagang gastos ang SFUSD

Ikinararangal kong makuha ang mga pag-eendoso nina/ng Senador Scott Wiener, Mayor London Breed, Dating Kandidato sa Pagkapresidente Andrew Yang, Dating Presidente ng Board of Supervisors Matt Gonzalez, at ng Chinese American Citizens’ Alliance.

Gagawin kong aksiyon ang mga salita para sa kapakanan ng ating mga estudyante at pamilya.

www.AnnForSFBoe.com

Ann Hsu

GABRIELA LÓPEZ

Ang aking trabaho ay Gurong Edukador.

Ang aking mga kuwalipikasyon ay:

Isa akong habambuhay nang mag-aaral at edukador at nakapaglingkod na ako bilang guro sa klasrum, edukador sa bilangguan, dating Presidente ng School Board, at kontraktuwal na propesor — isang guro ng mga edukador sa hinaharap. Naniniwala ako na maiaangat ng ating mga pampublikong paaralan ang bawat isa sa ating mga estudyante. Ang aking karanasan ang magbibigay ng inspirasyon at impormasyon sa aking trabaho sa San Francisco Board of Education.

Bilang unang henerasyon na Mehikano-Amerikano at Mag-aaral ng Wikang Ingles, lumaki ako sa mga pampublikong paaralan. Alam ko ang karanasan ng pagkakaroon ng mga magulang na nalampasan ang mga hadlang na dulot ng wika at kahirapan, at nang masuportahan ang pag-aaral ng kanilang mga anak. Araw-araw akong naroroon mismo sa lugar ng paggawa, kasama ang ating mga estudyante, guro at pamilya, at walang pagod na nagtatrabaho upang matugunan ang kanilang mga pangangailangan. Nang magsimula ang pandemyang COVID, nagtrabaho ako upang matiyak na napapakain ang mga bata ng ating lungsod, at mayroon tayo ng teknolohiyang kailangan nila upang maipagpatuloy ang kanilang pag-aaral.

Pakiramdam ko ay mayroon akong moral na responsibilidad na katawanin ang lahat ng estudyante, lalo na ang mga estudyanteng mababa ang kita at imigrante, na tulad ko, ay tuloy-tuloy na humaharap sa mga hadlang sa pag-aadbokasiya para sa de-kalidad na edukasyon. Nawawalan na ng pag-asa ang ating mga pamilya nang dahil sa kalagayan ng mga pampublikong paaralan. Tungkulin natin na manindigan na dapat maging pangunahing prayoridad ng distrito ang edukasyon at kagalingan ng kanilang mga anak.

Kasama sa aking iba pang prayoridad ang:

• Pagpapalaki sa Pondo at Pagpaparami sa mga Rekurso ng mga Paaralan

• Pagpapahusay sa mga Suporta sa Espesyal na Edukasyon

• Pagpapalawak sa mga Oportunidad sa Matematika, Pagbabasa, at Siyensiya

• Pamumuhunan sa Paghahanda para sa Kolehiyo

www.gabrielalopez.org

Gabriela López

LAINIE MOTAMEDI

Ang aking trabaho ay Itinalagang Miyembro, Board of Education.

Ang aking mga kuwalipikasyon ay:

Bilang magulang ng mga bata na nasa pampublikong paaralan, hindi pumasok ang mga anak kong nasa ika-5 at ika-8 grado sa loob ng mahigit sa isang taon sa panahon ng pandemya. Nagtuon ang dating school board sa politika, at hindi sa mga pangangailangan ng mga estudyante, pamilya, at edukador.

Itinalaga ako ni Mayor Breed noong Marso dahil sa aking matagumpay na karanasan sa mga problema ng distrito— pagboboluntaryo sa klasrum, konseho sa paaralan, mga PTA, at bilang itinalaga sa mga komite sa badyet ng kabuuan ng distrito. Magdadala ako ng 20 taon ng propesyonal na karanasan sa gobyerno, pagnenegosyo, at mga lupon ng nonprofit. Nakatuon ako sa pinakamabuti para sa mga bata, hindi sa politika.

Kailangang maging parolang ilaw ang San Francisco para sa pampublikong edukasyon! Prayoridad ko ang positibong mga kahihinatnan para sa lahat ng estudyante, kasama na ang:

Tagumpay ng mga estudyante

• Karapat-dapat ang ating mga anak na magkaroon ng napakahuhusay na paaralan at ng mga kakayahan, rekurso, at karanasan na kinakailangan upang matamo nila ang kanilang mga pangarap.

Responsibilidad sa pinansiya

• Kailangang tiyakin natin na naipapamahagi ang ating mga rekurso nang may katarungan sa pagkakapantay-pantay at para sa mga prayoridad ng mga estudyante.

Pakikinig sa boses ng komunidad.

• Napakahalaga ng mga pamilya, edukador, at pagpapalahok sa komunidad para sa tagumpay ng ating mga estudyante.

Ikinararangal ko ang pag-endoso nina/ng Senador Scott Wiener, Mayor London Breed, SF Parent Action, Mga Superbisor Myrna Melgar, Ahsha Safai, at Hillary Ronen, at marami pang ibang lider ng komunidad at mga magulang ng SF.

Samahan ako sa pagsuporta sa ating mga anak at sa kanilang kinabukasan sa www.lainieforsfboe.com.

Lainie Motamedi

LISA WEISSMAN-WARD

Ang aking trabaho ay Itinalagang Miyembro, Board of Education.

Ang aking mga kuwalipikasyon ay:

Bilang magulang na ikinararangal ang mga anak kong estudyante ng SFUSD, bilang produkto ng pampublikong edukasyon, mula sa pamilya ng mga edukador, at edukador mismo - napakalaking karangalan na makapaglingkod bilang Miyembro ng School Board.

Magmula noong maitalaga ako sa Board ni Mayor London Breed noong Marso, lubusan na akong nagtuon sa mga kinahihinatnan ng mga estudyante, pagiging bukas sa pagsisiyasat, at pagkakaroon ng pananagutan.

Ipinagkakapuri ko, na sa pakikipagtrabaho sa aking mga kasamahan, nagawa ko nang:

• Makapag-empleyo ng bagong Superintendente na may pananagutan sa kinahihinatnan ng mga estudyante

• Maghatid ng kinakailangang kita sa Distrito

• Makalikha ng balangkas na bukas sa pagsisiyasat at itinutulak ng komunidad, at nang maisulong ang kahusayan at katarungan sa pagkakapantay-pantay sa ating mga High school

• Maipasa ang balanseng badyet

• Mabawi ang pagkakatanggal sa trabaho ng mga guro at kawani

Panatilihin natin ang tuloy-tuloy na pagbabalik sa tamang landas ng SFUSD. Ang edukasyon ang pinakapundasyon upang maisulong ang ating Lungsod, Estado, at Bansa.

May kababaang-loob kong tinatanggap ang pag-eendoso nina Senador Scott Wiener, Mayor London Breed, Mga Superbisor Ahsha Safai at Myrna Melgar, United Educators of San Francisco, SF Parent Action, San Francisco Labor Council, at marami pang iba.

Sa wakas ay nasa landas na tayo ng pagpapanumbalik sa pananampalataya at tiwala sa ating mga pampublikong paaralan — samahan ako sa aking pag-aadbokasiya upang makuha ng lahat ng ating estudyante ang bukod-tanging edukasyon na nararapat para sa kanila sa www.lisaforsfboe.com.

Lisa Weissman-Ward